Daha bir Avropa Birliyi ölkəsi bu təşkilatdan çıxa bilər.

Fransanın qatı sağçı “Milli Cəbhə” partiyasının lideri, prezidentliyə namizəd Marine Le Pen ölkəsini Avropa Birliyindən çıxmağa çağırıb.

Marine Le Pen bildirib ki, prezident seçildiyi təqdirdə, Fransanı Avropa Birliyinə üzvlüyündən çıxarmağa çalışacaq:

“Artıq Fransa üçün Avropa Birliyi məsələsini bitirməyin zamanı çatıb. Çünki Avropa Birliyi xalqları parçalayır. Artıq bu bürokratiya canavarını rədd etmək lazımdır. Baxın, Avropa Birliyi Fransanı necə kiçiltdi, dünyadan məhrum etdi. Mən indi Fransanın kiçilmiş, asılı hala düşmüş və dünyadan qopmuş vəziyyəti ilə barışa bilmirəm”.

Xatırladaq ki, Fransada prezident seçkilərinin ilk turu aprel, ikinci turu isə may ayında keçiriləcək. Marine Le Penin seçkilərin ilk turunda ən çox səs qazanacağı gözlənilir.