Paytaxtı Bakıda , eləcə də ölkənin əksər regionlarında hər gün minlərlə alıcıının xidmətlərindən istifadə etdiyi geyim və ərzaq mağazaları, əyləncə mərkəzləri fəaliyyət göstərir.

“Sosial-İqtisadi və Ekoloji İnkişaf” İctimai Birliyinin sədri Rahilə Mehdiyeva mətbuata açıqlamasında deyib ki, şübhəsiz ki, bu ticarət və xidmət obyektləri müasirliyi, xidmətlərin çeşidi ilə bir-birindən fərqlənir. Bununla yanaşı, ticarət və xidmət obyektlərində istehlakçılara göstərilən xidmətlərin səviyyəsi də eyni deyildir: "Artıq şəhərimizdə yerli və xarici brendlərin iri ticarət mərkəzləri də açılmışdır və təbii ki, bunlar da öz yüksək xidmətləri ilə seçilirlər. Ancaq əksər alıcılar brend mağaza və ticarət obyektlərində deyil, mal və xidmətlərin daha ucuz təklif edildiyi alış-veriş məkanlarına üstünlük verirlər".

Onun sözlərinə görə, bəzən həmin mağazalarda, xüsusən geyim sektorlarında alıcı bir neçə mala baxır, ilkin seçim etdiyi paltarı geyinib çıxardıqda və ya baxdığı malı almadıqda satıcının “turşudulmuş” üz ifadəsi ilə, xoşagəlməz sözləri ilə qarşılaşmalı olur. Bu isə, istehlakçıda haqlı narazılıq yaradır: "İstehlakçı hüquqlarının müdafiəsi haqqında qanunda isə deyilir ki, istehlakçı, satıcının iş rejimini nəzərə almaqla, özü üçün əlverişli olan vaxtda sərbəst mal və xidmət seçmək hüququna malikdir. İstehlakçıya sərbəst mal və xidmət seçməkdə hər cür köməklik göstərmək isə satıcının borcudur.
Əslində ticarət obyektlərində satıcı mədəniyyətinin yüksək olması, müştəri məmnunluğunun yaradılması necə deyərlər, bu ticarət obyektinə “əlavə dividend” gətirir, daha çox müştəri cəlb edir. Deməli, müştəri məmnunluğunun yaradılması həm də sahibkarın daha çox gəlir əldə etməsinə imkanlar açır. Müştəri ilə davranış ticarət obyektərində çox önəmli məsələdir. Odur ki, həm satıcılar, həm də alıcılar bu məsələyə xüsusi diqqət yetirməlidir. İstehlakçı məmnunluğundan isə həm satıcı, həm də alıcı qazanır. Elə isə satıcılar, qazancınızı həm də istehlakçı məmnunluğu ilə artırın!"