Respublikanın görkəmli estrada müğənnisi Mirzə Babayevin anım günüdür.
Mirzə Babayev 1913-cü il iyul ayının 16-da Bakıda dünyaya gəlib. M.Əzizbəyov adına Sənaye İnstitutunun memarlıq fakültəsində ali təhsil alıb. Bakıda və Azərbaycanın digər şəhərlərində bir çox binaların və muzeylərin layihə müəllifidir.
M.Babayev müğənnilik fəaliyyətinə keçən əsrin 40-cı illərinin əvvəlində görkəmli bəstəkar Tofiq Quliyevin rəhbərlik etdiyi caz orkestrində başlayıb. Azərbaycan Dövlət Konservatoriyasında məşhur müğənni Bülbülün sinfində oxuyub.
Mirzə Babayev 30-dan çox filmdə rol alıb. Uzun illər Azərbaycan Dövlət Filarmoniyasında çalışıb.
Azərbaycan SSR-in Əməkdar artisti, Azərbaycan Respublikasının Xalq artisti adlarına layiq görülüb, iki dəfə "Humay" mükafatı laureatı olub.
İstedadlı sənətkar 2003-cü ildə 89 yaşında vəfat edib.