Milli Azərbaycan Tarixi Muzeyinin Numizmatika Fonduna Şamaxı şəhərində aşkarlanmış saxsı küpün içərisində olan dəfinə təhvil verilib.

Muzeydən  21 ədəd tam, 860 qr. paslı və fraqmentşəkilli sikkələrdən ibarət qeyd edilən dəfinə sikkələri Muzeyin Bərpa laboratoriyasına göndərilib. Təmizləndikdən sonra bu dirhəmlərin Şirvanşah Yəzid ibn Əhmədin (991-1027) hakimiyyəti dövründə zərb edildiyi müəyyən olunub. Bir sıra Qafqaz dəfinələrində aşkarlanmış, X əsrin sonu – XI əsrin əvvəllərinə aid şirvanşahların adları olan belə sikkələr Azərbaycanda sikkə zərbi və pul ticarətinin səciyyəvi cəhətlərini açıqlayan faktdır.