Türkiyə prezidenti Rəcəb Tayyib Ərdoğan Paris səfəri çərçivəsində fransız həmkarı Emmanuel Makronla keçirdiyi görüşdən sonra təşkil edilən mətbuat konfransında fransız jurnalistin sualına sərt cavab verib.

Jurnalist Türkiyənin Suriyaya TIR-larla silah göndərdiyini iddia edib.

Ərdoğanla jurnalist arasında dialoq bu şəkildə olub:

Ərdoğan: Sualınızı başa düşmədim, Suriyaya silah göndərən kimdir?

Jurnalist: 2014-cü ilin yanvar ayında sərhəddə içində silah olan MİT TIR-ları saxlanılmışdı.

Ərdoğan: Fəthullahçı Terror Təşkilarının (FETÖ) ağzı ilə danışırsınız.

Jurnalist: Bir jurnalist kimi danışıram.

Ərdoğan: Əməliyyatı keçirənlər FETÖ prokurorları idi. İndi həbsxanadadır. Kəşfiyyat orqanlarının belə əməliyyatlar üçün yük maşınları ilə silah daşımaq səlahiyyətləri var. Mənə bu sualı verirsiniz, ABŞ-ın Suriyaya 4 min TIR-la gətirdiyi silahlarla bağlı soruşmursunuz? Başqasının ağzı ilə danışmayın. Bunları asanlıqla udan deyilik. Xahiş edirik, FETÖ-nün ağzı ilə danışmamağı öyrənin.