Ümumi orta (IX illik) və tam orta təhsil bazasında (XI illik) orta ixtisas təhsili müəssisələrinə (kolleclərə) qəbul olunmaq istəyən və müsabiqə şərtlərini ödəyən cari ilin məzunları üçün elektron ərizə qəbulunun müddəti kolleclərə ixtisas seçimi mərhələsi başa çatanadək uzadılıb.

Tələbə Qəbulu üzrə Dövlət Komissiyasından (TQDK) bildiriblər ki, abituriyentlər TQDK-nın internet saytında “Abituriyentin elektron ərizəsi” formasını doldurduqdan sonra ərizələrini təsdiqləməlidirlər. Orta ixtisas təhsili müəssisələrinə ixtisas seçimi ümumi orta təhsil bazası (9 illik) üzrə iyulun 8‑dən 18-dək, tam orta təhsil bazası (11 illik) üzrə avqustun 15-dən 19-dək aparılacaq.