Bakıda keçirilən 4-cü İslam Həmrəylik Oyunlarının boks yarışlarında 69 kq çəki dərəcəsində gümüş medal qazanan Tamerlan Abdullayev bıçaqlanıb.

Boksçunun özü məlumat verib.

O bildirib ki, hazırda xəstəxanadadır vəziyyəti yaxşılığa doğru gedir:

"Dünən əməliyyat olunmuşam. Vəziyyətim yaxşıdır. Yəqin ki, səsimdən də hiss edirsiz ki, yaxşıyam. Təşəkkür edirəm".

Xatırladaq ki, boksçumuz 1 saylı Kliniki Tibbi Mərkəzə yerləşdirilib.

Bakının Nəsimi rayonu ərazisində boks üzrə Azərbaycan çempionu bıçaqlanıb.

1992-ci il təvəllüdlü Abdullayev Tamerlan Namiq oğlu iaşə obyektlərinin birində öz doğum gününü qeyd edib.

Həmin vaxt o, restoranda tanımadığı şəxslə mübahisə edib və restorandan bayıra çıxarılaraq bıçaqlanıb. Yaralı 1 saylı Kliniki Tibbi Mərkəzə yerləşdirilib. T.Abdullayev cərrahi əməliyyat olunub. Həkimlərin verdiyi məlumata görə, xəstənin vəziyyəti orta-ağırdır.

Faktla bağlı Nəsimi Rayon Polis İdarəsinin 20-ci Polis bölməsinin əməkdaşları hadisənin dəqiq səbəblərini araşdırır.

T.Abdullayev IV İslam Həmrəyliyi Oyunlarında boks yarışları üzrə 69 kq. çəki dərəcəsində gümüş medal qazanıb. İdmançı, o cümlədən 2013-cü il boks üzrə Avropa çempionatında 1/4 finala çıxıb. 2013-cü ildə isə 69 kq. çəki dərəcəsində boks üzrə ölkə çempionu adına layiq görülüb.