7 fevral 2024-cü ildə keçirilən prezident seçkiləri ölkəmizin bütün suveren ərazilərini əhatə etməsi
baxımından müstəsna əhəmiyyət kəsb etdi. Qədirbilən xalqımız öz vicdan və vətəndaşlıq borcunu yerinə
yetirmək üçün böyük sevinc hissi ilə seçki məntəqələrinə axışdı. Qalib Xalqımız Qalib Liderini yenidən öz
rəhbəri seçdi. 3 il əvvəl Vətən müharibəsi dövründə dünyaya nümayiş etdirilən milli həmrəylik və birlik 7 fevral
tarixində də respublikamızın bütün ərazisində yaradılmış seçki məntəqələrində bir daha təkrarlandı. Seçici
aktivliyinin yüksək olmasını hətta seçkiləri izləmək üçün ölkəmizə akreditə olunmuş beynəlxalq müşahidəçilər
də etiraf etdilər: tam ədalətli, şəffaf şəkildə keçirilən seçkilər dünya demokratiyası üçün də bir örnək oldu.
Seçkilərin bu cür uğurlu alınması Xalq-Lider birliyinin, Xalqın Liderinə sevgisinin və sədaqətinin təsdiqi, həm
də gələcəyinə inam və əminlik mesajı idi.
Seçkidən əvvəl xüsusilə Avropada ölkəmizə qarşı qarayaxma kampaniyası aparan ermənipərəst
avroparlamentarilərə cənab Prezident məhz Xankəndidə səs verməklə tutarlı cavab verdi. Bu gün lidersizlik
problem yaşayan Avropa rəsmiləri də xalqımızın bu coşqusu qarşısında aciz qaldılar. Bu gün dünyanın əksər
ölkələrindən Qalib Prezidentə təbriklər gəlir, xoş sözlər səslənir.
Bu seçkilər həm də dövlət başçımızın 20 illik prezidentliyi dövrünün yekunu, yeni dövrün başlanğıcı
üçün xüsusi önəm daşıyırdı. Prezident İlham Əliyev 20 illik siyasi fəaliyyəti dövründə xalqımızı adım-addım
böyük Qələbəyə doğru gətirdi. Düşünülmüş iqtisadi siyasət, beynəlxalq qurumlar və aparıcı siyasi aktorlarla
qurulmuş praqmatik və səmərəli əlaqələr nəticəsində Azərbaycan dünya siyasət meydanında öz sözünü deyə
bilən ölkəyə çevrildi. Prezident İlham Əliyev ölkəmizə regionun lideri, etibarlı tərəfdaş, tranzit və tolerant ölkə
imici qazandırdı.
“İqtisadi olaraq müstəqil olmayan dövlət siyasi olaraq müstəqil ola bilməz” prizmasından hərəkət edən
dövlət başçısı xüsusilə enerji layihələrindən əldə olunan gəlirləri hərbi-strateji hədəflərə, əhalinin sosial-rifah
halının yüksəltməsinə yönəltdi. Bütün bunlar Azərbaycanın müstəqil siyasət həyata keçirməsinə geniş imkanlar
yaratdı.
Bu gün Azərbaycanın həyata keçirdiyi uğurlu siyasət onu dünya siyasətində əhəmiyyətli aktora çevirib.
Qoşulmama Hərəkatına iki dövr üzrə uğurlu sədrlik və BMT Təhlükəsizlik Şurasının qeyri-daimi üzvü kimi
fəaliyyətimiz beynəlxalq müstəvidə mövqelərimizi daha da möhkəmləndirdi. BMT-nin İqlim Dəyişikliyi üzrə
Çərçivə Konvensiyasının Tərəflər Konfransının 29-cu sessiyasının (COP29) Azərbaycanda keçirilməsinə dair
qəbul edilmiş qərar isə Azərbaycana növbəti etimadın bariz göstəricisidir. Beləliklə, Prezident İlham Əliyevin
rəhbərliyi ilə siyasi, iqtisadi, sosial, mədəni və digər sahələrdə qazandığımız bütün bu nailiyyətlər Azərbaycanın
öz inkişafının zirvəsində olduğunu bir daha təsdiq edir.
Öz ərazi bütövlüyünü və suverenliyini bərpa edən Azərbaycanımızın son 200 illik tarixinə Qalib
Sərkərdə kimi adını yazdıran Ali Baş Komandan keçmiş qaçqın və məcburi köçkünlərimizin yurd, torpaq
həsrətinə son qoydu. Bu gün xalqımız dövlət başçımızın rəhbərliyi altında Qarabağı və Şərqi Zəngəzuru
dirçəltməklə, bu torpaqlara yenidən həyata verməklə məşğuldur.
Fevralın 14-də Milli Məclisdə keçirilən Azərbaycan Respublikasının Prezidenti İlham Əliyevin andiçmə
mərasimində ölkə başçısı demişdir: Növbəti önəmli vəzifə Qarabağ və Şərqi Zəngəzurun bərpa edilməsidir. Bu
günə qədər təxminən 5400 keçmiş köçkün artıq beş yaşayış məntəqəsinə göndərilib, orada yerləşdirilib və bu il
ən azı 20 yaşayış məntəqəsinə keçmiş köçkünlər qayıdacaq. Bizim planımız azad edilmiş torpaqlarda ilin sonuna
qədər 5 şəhərə və 15 kəndə 20 min keçmiş köçkünü yerləşdirməkdir. Yüzdən çox şəhərin və kəndin baş planları
hazırlanıb, təsdiqlənib. Bir çox şəhər və kəndlərdə artıq inşaat işləri başlamışdır. Biz Böyük Qayıdış proqramının
birinci mərhələsini 2026-cı ilin sonunda başa çatdıracağıq və o vaxt 140 min köçkün öz dədə-baba torpaqlarına
qayıdacaq. Bununla paralel olaraq, bütün sosial infrastruktur inşa edilir, xəstəxanalar, məktəblər, idman
obyektləri, infrastruktur obyektləri, yollar, 130-dan çox tunel və körpü, – 40 tunel və 90 körpü, – inşa edilir.
Yəni, bu, sadəcə olaraq işin miqyasını göstərir, bütün elektrik təsərrüfatı yenidən qurulub, dəmir yolları çəkilir,
iki beynəlxalq hava limanı açılıb, üçüncüsü də Laçında açılacaq. Yəni, geniş quruculuq işləri görüləcək. Əlbəttə
ki, köçkünlər üçün yeni evlər, bütün müasir şəhərsalma qaydalarına uyğun olan yaşayış yerləri qurulacaq və
tarixi şəhərlərimizin tarixi siması bərpa ediləcək”.
Yeni dövrün yeni çağışları hər bir azərbaycanlının qarşısında yeni hədəflər və vəzifələr qoyur. Qüdrətli
və güclü Azərbaycan quruculuğunda hər birimiz səfərbər olmalı, yeni dövrün yeni ideya və məramının
müəyyənləşdirilməsi üçün ictimai-elmi müzakirələr aparmalı, cənab Prezidentin açdığı yolda yeni uğurlara və
həfəflərə doğru inamla addımlamalı, üzərimizə düşən vəzifələri vicdanla yerinə yetirməliyik.
Mahir Tarverdiyev,
Sabirabad Dövlət Sosial-İqtisad Kollecinin direktoru