Sentyabrın 26-da keçirilən iqtisadi məsələlərə həsr olunan müşavirədə dövlət başçısı
İlham Əliyev bir daha diqqəti əsas hədəfimiz olan dayanıqlı inkişaf modelinin
təkmilləşdirilməsinə yönəltdi. Bildirdi ki, ilin əvvəlindən iqtisadi inkişaf gözlənilən səviyyədədir.
«İlin əvvəlində mən bu ilin iqtisadi sahədə uğurlu olub-olmaması haqqında danışanda qeyd
etmişdim ki, tam əminəm, bu il iqtisadiyyatımız üçün uğurlu olacaq. İlin əvvəlindən əldə
edilmiş nəticələr və iqtisadi göstəricilər mənim sözlərimi təsdiqləyir» söyləyən cənab İlham
Əliyev diqqəti cari ilin ötən dövrünün əsas iqtisadi göstəricilərinə yönəltdi. Belə ki, iqtisadi
artım 4,3 faiz təşkil edib. Bugünkü dünyada gedən prosesləri təhlil edərkən və ümumiyyətlə,
geosiyasi vəziyyətə nəzər saldıqda bu, çox müsbət göstəricidir. İqtisadi inkişaf templəri inkişaf
etmiş bir çox ölkələrdə olan iqtisadi inkişaf templərini üstələyir. Xüsusi əhəmiyyət daşıyan
məqam ondan ibarətdir ki, qeyri-neft sektorumuz 7 faiz artıb. Bu da onu göstərir ki, ölkə
iqtisadiyyatının şaxələndirilməsi istiqamətində atılmış addımlar və düşünülmüş islahatlar
siyasəti öz bəhrəsini verməkdədir.
İnfrastruktur layihələri çox geniş miqyas alıb. 3 min kilometr avtomobil yolu inşa edilib.
Ümumi layihələrin sırasında 45 tunel nəzərdə tutulur. Bu tunellərin uzunluğu 70 kilometrdir. O
dağlarda tunel açmaq, yol salmaq asan məsələ deyil. 450 körpünün inşası nəzərdə tutulur.
Dəmir yolları, iki Beynəlxalq Hava Limanı istifadəyə verildi. Enerji potensialı gücləndirilir və
son üç il ərzində 270 meqavat gücündə su elektrik stansiyaları istismara verildi və bu proses
davam etdirilir. Məktəblər, xəstəxanalar, sosial obyektlər, kəndlər salınır. Bir sözlə, Qarabağın
və Şərqi Zəngəzurun dirçəldilməsi üçün genişmiqyaslı işlər aparılır.
“Böyük qayıdış” Proqramı uğurla icra olunur. Bütün böyük infrastruktur layihələri ilə
yanaşı, əsas nailiyyətimiz odur ki, 4 şəhərə və 4 kəndə keçmiş köçkünlər qayıtmışlar. Dövlət
başçısı İlham Əliyev sözügedən çıxışında bu məqamları xüsusi qeyd etdi.
Böyük Qayıdış Proqramının birinci mərhələsi 2026-cı ilin sonunda başa çatacaq. Hədəf
bu mərhələdə 140 min keçmiş köçkünü öz dədə-baba torpaqlarına qaytarmaqdır. Prezident
İlham Əliyev bu əminliyi ifadə edir ki, biz buna da nail olacağıq.
2024-cü ilin geridə qalan ayları göstərir ki, Azərbaycan iqtisadiyyatı dayanaqlı iqtisadi
inkişaf tempini qoruyub saxlayıb. Bir tərəfdən Ümumi Daxili Məhsuldakı artım, digər tərəfdən
qeyri-neft sektorunun iqtisadi artımdakı rolunun genişləndirilməsi və artıq drayverə çevrilməsi
ondan xəbər verir ki, Azərbaycanda iqtisadiyyatın inkişafı ilə bağlı hədəflərə nail olunması,
eyni zamanda neftdən asılılığın minimumlaşdırılması ilə bağlı strategiya uğurla icra edilir.
İqtisadi artım dayanıqlıdır və son illər iqtisadi artım tempi qorunub saxlanılıb. Digər tərəfdən
isə iqtisadi artımda qeyri-neft sektoru xüsusi paya malikdir. Bu da iqtisadiyyatın şaxələnməsi
baxımından vacibdir. Eyni zamanda Azərbaycan iqtisadiyyatında təhlükəsizlik yastığı daha da
güclənir. Çünki Azərbaycan xarici borcun ÜDM-dəki payına görə dünyada ən yaxşı
göstəricilərdən birinə malik olan ölkələrdəndir. Bu da ondan xəbər verir ki, Azərbaycan
iqtisadiyyatı təhlükəsizlik yastığına malikdir. Xüsusilə də xarici faktorlardan iqtisadiyyatın
asılılığını minimumlaşdırıb. 2024-cü ilin geridə qalan ayları üçün planlaşdırılan nəticələrə,
hədəflərə praktik olaraq nail olmaq mümkün olub. Bu isə ilin yekununda daha sürətli iqtisadi
artımın əldə edilməsinə imkan yaradacaq.
Yeganə Cəbiyeva,
S.Vurğun adına 3 saylı Sabirabad şəhər tam orta məktəbinin tarix müəllimi