Dekabrın 1-də Heydər Əliyev Sarayında Əməkdar İncəsənət Xadimi, bəstəkar Aygün Səmədzadənin “Biri varmış, biri yoxmuş” adlı sənət gecəsi keçirilib.

Gecədə hökumət nümayəndələri, Milli Məclisin deputatları, respublikanın bir çox tanınmış mədəniyyət və incəsənət xadimləri iştirak ediblər.

Bütün qonaqları salamlayan Aygün Səmədzadə bildirib ki, gecədə təqdim olunacaq əsərlər uzun illərin zəhmətinin bəhrəsidir. Zaman-zaman içində gəzdirdiyi hisləri, duyğuları musiqi ilə paylaşdığını söyləyən bəstəkar deyib ki, əgər bəstələrimi insanlara sevdirə bilmişəmsə demək çəkdiyim zəhmət hədər getməyib. Sənətinə verilən diqqətə görə bütün musiqisevərlərə minnətdarlığını bildirən bəstəkar sözü musiqiyə verib.

Gecədə bəstəkarın populyar mahnıları ilə yanaşı, simfonik əsərləri və xoreoqrafik kompozisiyaları da təqdim olunub. Xalq Artisti Teymur Göyçayevin rəhbərlik etdiyi Qara Qarayev adına Dövlət kamera orkestri tədbiri daha da rövnəqləndirib.

Bəstəkarın sənət gecəsi maraqlı təqdimatlarla, bənzərsiz ifalarla, qəlb oxşayan bəstələrin canlı səslənməsi ilə bütün iştirakçılar tərəfindən maraqla qarşılanıb.

Qeyd edək ki, Azərbaycan mədəniyyətinin təbliği ilə bağlı bir sıra televiziya layihələrinin ideya müəllifi və rəhbəri olmuş bəstəkar müxtəlif vokal-xoreoqrafik kompozisiyalarla yanaşı, bir çox tanınmış müğənnilərin repertuarında yer alan yüzədək mahnının müəllifidir.