Xorvatiyalı yarımmüdafiәçi Daniel Franyiç “Qәbәlә”dәn ayrılıb. Futbolçu bununla bağlı “Qafqazinfo”ya müsahibә verib.

- Niyә siz Antalyaya aparılmamısız?

- Artıq “Qәbәlә”nin futbolçusu deyilәm. Yarım saat әvvәl müqavilәmә xitam vermişәm.

- Sәbәb?

- Baş mәşqçinin qәrarıdı. Bu barәdә heç nә deyә bilmәrәm.

- Sizcә, niyә komandada möhkәmlәnә bilmәdiniz?

- Mәn çempionatda 2-3 oyuna çıxdım. Avropa Liqasında isә cәmi 60 dәqiqә meydanda olmuşam. Bu özünü göstәrmәk üçün yetәrli müddәt deyil. Baş mәşqçi nә qәrar verirsә, ona hörmәt etmәlisәn. Ehtiyatda oturmaq vә ya әvәzedici komandada oynamaq istәmirәm. Çünki yaşım çox deyil. Mәn oynamalıyam.

- Niyә bu qәdәr gec göndәrildiniz? Qış fasilәsindә ayrıla bilәrdiniz...

- Bunu mәn dә düşünürәm. Çәtin vәziyyәtdir. Amma özümә komanda tapmağa çalışacam.

- Sizin Qәbәlәdә saxlanılmağınızın sәbәbi müqavilәnizi pozmağınıza görә ola bilәr?

- Tәbii ki, bu belәdir. Onlar mәni burada saxladılar ki, müqavilәmi pozum vә tәzminat tәlәb etmәyim. Әslindә bunun başqa yolları var idi. Amma “Qәbәlә” ilә döyüşmәk vә onları mәhkәmәyә vermәk istәmәdim. Mәnim 25 yaşım var ehtiyatda qalmaq istәmirәm. Belә dә yarım ilimi dә boşa verәcәm. Ona görә gedirәm.Özünü başqa klubda yenidәn tapmaq çәtindir.

- Haqqınızda maraqlı bir şey eşitdim. Baş mәşqçi Roman Qriqorçuk iclasların birindә sizә “Franyiç, sәn mәn videoda baxdığım oyunçunun klonu deyilsәn" deyib. Bu doğrudur?

- Doğrudur. “Anderlecht”lə oyunda etdiyim bir driblinqdәn sonra elә bir cümlә demişdi. Amma bu barәdә danışmaq istәmirәm. “Qәbәlә”dәn yaxşı xatirәlәrim var. İstәr oyunçularla, istәr azarkeşlәrlә.

- Qriqorçukla son söhbәtiniz nә olub?

- Onunla danışmamışıq.

- Ölkәmizi haçan tәrk edirsiz?

- Bu gün axşam.