Yüksək ixtisaslı memar, inşaatçı mühəndislər və iqtisadçılar hazırlayan tanınmış elm və təhsil mərkəzinin professor, müəllim və tələbə heyəti 20 yanvar şəhidlərinin xatırəsini anmaq üçün mitinq keçirtdi.

Azərbaycan Memarlıq və İnşaat Universitetinin mətbuat xidmətindən bildiriblər ki, Azərbaycan Memarliq və İnşaat Universiteti üçün bu gün, xalqın tarixinə yazılmış qanlı yanvar olmaqla yanaşı, həm də AzMİU-nin da var olma tarixinə qara hərflərlə düşüb. Çünki bu təqvimdə, 20 yanvar tarixində universitetin 4 tələbəsi öz qanları ilə Azərbaycanın müstəqilliyini tarixə yazan Azərbaycan övladları sırasındadırlar.

"20 yanvar faciəsi nəinki Azərbaycan xalqına qarşı törədilmiş qətliam, hətta insanlığa qarşı törədilmiş ən ağır cinayətlərdən biridir". Bunu faciənin 25-ci ildönümü münasibətilə “Memarlıq və İnşaat” universitetində keçirilmiş tədbirdə rektor Gülçöhrə Məmmədova deyib. Digər çıxış edənlər də, həmin dönəmlərdə xalqımızın haqsızlığa məruz qaldığını vurğulayaraq, o illəri bir daha yada salıblar. “ Anım tədbirinin hər il keçirilməsində məqsəd 25 il öncə baş vermiş hadisəni Azərbaycan gəncliyi adından dünya ictimaiyyətinə çatdırmaq, baş vermiş faciəyə hüquqi qiymətin verilməsini təmin etməkdə Azərbaycan xalqının gəncliyi olaraq yanında olduğumuzu sübut etməkdir. Bu hadisə gənc və gələcək nəslin beynində unudulmayan tarix kimi yazılmalıdır” – rektor Gülçöhrə Məmmədova mitinqi bu sözlərlə bitirib.