Avstriyada bazar günü keçirilən parlament seçkilərində qələbə çalmağa daha şanslı sayılan mühafizəkar Xalq Partiyasının (ÖVP) lideri Sebastian Kurz-un cəmi 31 yaşı var.

İfrat sağçı Azadlıq Partiyası (FPÖ) və Sosial-Demokratlar Partiyası, rəy sorğularının nəticələrinə əsasən, ikinci yer uğrunda mübarizə aparacaq.

Milli.Az BBC-yə istinadən bildirir ki, hazırkı hökümət ÖVP ilə Sosial-Demokratlar partiyasının koalisiyası əsasında qurulub, həmin koalisiyada aparıcı rolu Sosial-Demokratlar partiyası oynayır.

Seçkiqabağı kampaniyanın gedişində əsas mövzu immiqrasiya məsələsi olub, və güman edildiyinə görə, son illər ərzində FPÖ-nun hakimiyyətə qayıdışı üçün hazırda ən əlverişli şərait yaranıb.

Dekabr ayında keçirilmiş prezident seçkilərində partiyanın namizədi Norbert Hofer 46% toplayaraq qələbə çalmağa yaxın olsa da, o, Yaşıllar partiyasının namizədi, 53% səs toplamış Alexander Van der Bellen-ə məğlub oldu.

Avstriyada budəfəki parlament seçkiləri 2015-ci ildə Avropaya böyük sayda sənədsiz miqrant və qaçqın axınının doğurduğu əndişə fonunda keçirilir.

Seçkidə qalib gələn partiyaya yeni höküməti formalaşdırmaq tapşırılacaq.

1980-ci ildən bəri Avstriyada parlament seçkilərində qalib gələn partiya digər partiya ilə koalisiyaya girmək şərti ilə hökümət qura bilib.