Azərbaycan Dövlət İqtisad Universitetində Təhsil Nazirliyi sisteminə daxil olan ümumi təhsil müəssisələrinə direktor vəzifəsinə işə qəbul ilə bağlı test imtahanı mərhələsinə başlanılıb.
Nazirlikdən AZƏRTAC-a bildiriblər ki, məktəb direktoru olmaq istəyən namizədlərin üçüncü mərhələdə - imtahanda iştirakı prosesi tam elektronlaşdırılıb. Bütün proseslər xüsusi proqram təminatı vasitəsilə həyata keçirilir. Hər namizədə 120 dəqiqə vaxt verilir. Bu vaxtın 90 dəqiqəsi sual-cavab, qalan 30 dəqiqəsi isə esse yazılması üçün nəzərdə tutulub.
Esse yazmaq üçün də proqram təminatı yaradılıb və namizədlər mövzuya uyğun fikirlərini kompyuter vasitəsilə qeyd edə bilirlər. İnformasiya-kommunikasiya texnologiyaları bilikləri zəif olan namizədlər üçün kağızda yazmaq imkanı yaradılır. İmtahanlar üç gün (bazar günü də daxil olmaqla) davam edəcək.
İmtahanın nəticələri aprelin 18-də məlum olacaq.